Welkom óppe website vanne StuTS

De Studentische Tagung Sprachwissenschaft (StuTS, in ’t Limburgs Sjtudenteconferentie Taalweitesjap) is ’ne onaafhankelijke Duitstalige en deils Ingelstalige conferentie veur diverse taalkundige gebeeje en vinjt eine kier per semester plaats op ‘ne universiteit in Pruuses of ein van de umliggende lènj.

’t Doel vanne StuTS is um sjtudente oet allerlei vakgebeeje die mèt taalweitesjap te make höbbe biejein te bringe en häör de meugelijkheid te gaeve um zich te liere kènne en kènnis oet te wissele.

De reis nao de conferentie wuuert meistal door de deilnimmers zèlf betaald, mèr de órganisatie sjtèlt traditiegetroew ’ne verbliefplaats besjikbaar, biej biejveurbeeld sjtudente die inne desbetreffende plaats woeëne, in hostels of gymzalen. Ontbijt en middigaete zitte meistal biej de pries inbegrepe.

De StuTS richt zich zowaal óp weitesjappelijk óngerzeuk es óp sociale activiteite tösse sjtudente. Sjtudente kènne euver ’n bepaold óngerwerp van häor eige óngerzeuk sjpraeke, biejveurbeeld häöre scriptie of eige vakgebied, óf zie kènne biejveurbeeld ‘ne korte vertaalworkshop gaeve.

De StuTS is ‘ne unieke kans um ugge ideeë te presentere in ‘ne informele umgaeving, zónger de drök van ’n cursus óppe universiteit of de aanwezigheid van beroemde experts.

Ein van de hoeëgtepunte vanne conferentie is de laezingen van keynotesjpraekers. Dit zien meistal bekende professore vanne lokale universiteit. Zie kènne häör óngerzeuk en ’t óngerzeuk det aan häöre universiteit weurt gedaon presentere aan sjtudente van angere universiteiten.

Es lètste kriege sjtudente auch de kans um de sjtad wao de conferentie georganiseerd wuuert te liere kènne door biejveurbeeld ‘ne tour door de sjtad of euver de campus en door de brunch aan ’t einde.